बारम्बार विदेश जाने नेपाली नेताले किन सिक्दैनन् विकास गर्ने विदेशी शैली ?

सडक तथा पुल

गृहपृष्ठ
सडक तथा पुल
बारम्बार विदेश जाने नेपाली नेताले किन सिक्दैनन् विकास गर्ने विदेशी शैली ?

बारम्बार विदेश जाने नेपाली नेताले किन सिक्दैनन् विकास गर्ने विदेशी शैली ?

बिहीबार, वैशाख ८, २०७९ उमेश कुमार गाैतम

सिड्नी। यो तस्बिर अस्ट्रेलियाको सिड्नी स्थित काेरिमलको एउटा सडकको हो जहाँ सडक वारपार गर्न पैदल यात्रीका लागि जेब्रा क्रसिङ निर्माण भइरहेको छ। यहाँको कार्यालय समयमा लिइएको यो तस्बिरमा निर्माण कार्य भइरहेको देखिन्दैन किनकी यहाँ सडकमा समस्या हुन नदिनका लागि राति मात्र सडकको काम गरिन्छ।

कुनै आपतकालिन अवस्था नभएको खण्डमा साँझ सवारीसाधन र मानिसहरुको चाप कम हुन थालेपछि मात्र यहाँ सडकको काम गर्न शुरु गरिन्छ। यो निर्माणाधीन स्थानभन्दा करिब ३०० मिटरको दूरीमा नै अर्को जेब्रा क्रसिङ छ तर उक्त जेब्रा क्रसिङले मानिसको चाप धान्न नसकेपछि यहाँ अर्को जेब्रा क्रसिङ निर्माण गर्न शुरु गरिएको हो।

यो जेब्रा क्रसिङ निर्माण शुरु गरिएको ४ देखि ५ दिनमा नै सम्पन्न हुन्छ। नेपालका सडकहरुमा जताततै खाल्डाखुल्डी हुन्छन् जुन महिनौसम्म मर्मत सम्भार हुँदैनन्। त्यसकै कारण सडकमा जाम हुने, दुर्घटना हुने लगायतका समस्याहरु बारम्बार भइरहेका हुन्छन् तर पनि नेपालको कार्य प्रणालीमा सुधार हुन सकेको देखिन्दैन।

सडकमा एउटा सानो काम गर्नुपर्यो भने हजारौँ यात्रुले जामको समस्या झेल्नुपर्ने बाध्यता छ नेपालमा । ठूला ठूला आयोजना निर्माण गरेर जनतालाई सुखसुविधा दिन नसकेपनि सम्भव हुने यस्ता साना समस्या समाधान गरेर सानो कारणले जनतालाई ठूलो सास्ती दिने प्रचलनको अन्त्य नेपालमा कहिले होला? मन्त्री, प्रधानमन्त्री पद पाउनासाथ बारम्बार विभिन्न मुलुक भ्रमणका लागि पुग्ने हाम्रा नेताज्यूहरुले विदेशमा भएका यस्ता साना र सहजै जनतालाई दिन सक्ने सुविधाबारे पनि अनुसरण गर्ने कि?