काठमाडौं। नवलपरासी (बर्दघाट–सुस्तापूर्व) को गैंडाकोट नगरपालिकामा सडकका कारण टेलिकमको सेवा विस्तारमा समस्या भएको छ। नारायणगढ–बुटवल सडक विस्तारका क्रममा गैंडाकोट क्षेत्रमा विद्युत्का खम्बा हटाउन ढिला हुँदा टेलिकमको सेवा विस्तारमा समस्या भएको नेपाल टेलिकमले जानकारी दिएको छ।
टेलिकमका गण्डकी प्रदेश निर्देशनालयका वरिष्ठ इन्जिनीयरले सडकका कारण मुख्य राजमार्ग क्षेत्रमा टेलिकमको नयाँ सेवा विस्तारमा समस्या भएको जानकारी दिएका छन्। टेलिकमले बिजुलीका खम्बामा फाइबर तार टाँगेर ग्राहकलाई एउटै तारबाट इन्टरनेट, टेलिफोन र टेलिभिजन सेवा दिँदै आएकोमा हाल सडक विस्तार भइरहेको गैंडाकोट क्षेत्रमा बिजुलीका खम्बा सार्न ढिलाइ भएकाले मुख्य बजार क्षेत्रमा सेवा दिन नपाएको उनले जनाएका छन्।
हाल भइरहेका खम्बामा टेलिकमको तार टाँगेको अवस्थामा फेरि सार्ने बेलामा कठिन हुने भएकाले सेवा विस्तारमा समस्या आइरहेको उनको भनाइ रहेको छ। यसैगरी मनाङमा केही दिन अगाडि मात्रै टेलिकमको फाइबर पुर्याएको र त्यहाँ फाइबर पुगेसँगै प्रदेशका सबै जिल्लाका सेवाग्राहीले एउटै तारबाट इन्टरनेट, टेलिफोन र टेलिभिजनका सेवा लिन सक्ने भएको जनाइएको छ।
टेलिकमले पहिले वितरण गर्दै आएको एडिएसल सेवा विस्थापित गर्दै नयाँ सेवा प्रदान गर्नसमेत फाइबरको प्रयोग गर्न गण्डकी प्रदेश निर्देशनालयका वरिष्ठ इन्जिनीयरले आग्रह गरेका छन्। यसैगरी टेलिकमको फाइबर टु होम सेवालाई प्रदेशका सबै जिल्लाका साथै नवलपुर जिल्लाभर विस्तार गर्न क्षमता बढाउने काम भइरहेको उनले जानकारी दिएका छन्।
उक्त जिल्लाको सदरमुकाम कावासोतीमा लेखा शाखाका रूपमा टेलिकमले सबै सेवा प्रदान गर्ने गरी नयाँ कार्यालय खोलेकाले अब त्यहाँका नागरिकलाई गुणस्तरीय इन्टरनेटसँगै टेलिफोन र मोबाइल फोन सेवा पुर्याइने उनले जनाएका छन्।
