नेपाल–भारत जोड्ने मोटरेबल पुल निर्माण शुरु

सडक तथा पुल

गृहपृष्ठ
सडक तथा पुल
नेपाल–भारत जोड्ने मोटरेबल पुल निर्माण शुरु

नेपाल–भारत जोड्ने मोटरेबल पुल निर्माण शुरु

शनिबार, फागुन २१, २०७८ निर्माणपाटी संवाददाता

दार्चुला। दार्चुलामा नेपाल–भारत जोड्ने मोटरेबल पुल निर्माण गर्न शुरु गरिएको छ। महाकाली नगरपालिका–८ अस्खेडा बगर र भारततर्फ बलुवाकोट नजिकको थार्चुम बगर जोड्ने महाकाली नदीमाथि पुल बनाउन शुरु गरिएको हो।

यो पुलले नेपालको सुदूरपश्चिम प्रदेश र भारतको उत्तराखण्ड राज्यबीचको सीमापार ‘कनेक्टिभिटी’लाई सुदृढ बनाउनाका साथै दुवैतर्फको सीमा समुदायबीच रहेको सम्पर्कलाई थप मजबुत बनाउने भारतीय दूतावासले जानकारी दिएको छ । पुल निर्माणका लागि लामो समयदेखि प्रयास भइरहेको थियो ।

नेपाल–भारत आउजाउ गर्न दार्चुलाको महाकाली नदीमा झोलुङ्गे पुल र धेरै स्थानमा तुइनबाट जोखिमपूर्ण यात्रा गर्नुपर्छ । मोटरेबल पुल निर्माण भए आउजाउमा सजिलो हुनाका साथै मालसमान ढुवानीमा पनि सहज हुने स्थानीयवासीले आशा गरेका छन् ।

गत माघ १८ गते भौतिक पूर्वाधार तथा यातायातमन्त्री रेणुकुमारी यादवका उपस्थितिमा नेपालका लागि भारतीय राजदूत विनयमोहन क्वात्रा र नेपाल सरकारका तर्फबाट भौतिक पूर्वाधार तथा यातायात मन्त्रालयका सचिव रवीन्द्रनाथ श्रेष्ठले पुल निर्माणका लागि सम्झौतापत्रमा हस्ताक्षर भएको थियो ।

सीमा नदी महाकालीमा मोटरेबल पुल निर्माण हुने भएपछि यहाँका स्थानीयवासी भने खुसी भएका छन् । भारतसँग सीमा जोडिएको कञ्चनपुरपछि दार्चुलामा मोटरेबल पुल निर्माण हुन लागेको हो ।

प्रकाशित मिति: शनिबार, फागुन २१, २०७८ १३:०१