वैकल्पिक प्रणालीबाट ल्याईएको मेलम्चीको पानी बन्द

खानेपानी तथा ढल निकास

गृहपृष्ठ
खानेपानी तथा ढल निकास
वैकल्पिक प्रणालीबाट ल्याईएको मेलम्चीको पानी बन्द

वैकल्पिक प्रणालीबाट ल्याईएको मेलम्चीको पानी बन्द

बुधबार, जेठ १८, २०७९ निर्माणपाटी संवाददाता

काठमाण्डौं। सिन्धुपाल्चोकको हेलम्बु गाउँपालिकास्थित मेलम्ची खोलाको मुहानबाट काठमाडौँ ल्याइएको पानी वर्षाद्का कारण सुरुङ्मा क्षति नहोस् भनी सावधानी अपनाउँदै बन्द गरिएको छ। निरन्तर वर्षा हुने र बाढी आउने क्रम बढ्न थालेपछि वैकल्पिक प्रणालीबाट ल्याइएको मेलम्चीको पानी बन्द गरिएको हो।

हिजोदेखि बन्द गरिएको पानी सुक्खा मौसम लागेपछि फेरि वैकल्पिक प्रणालीबाट राजधानी ल्याइने बताईएको छ। मेलम्चीको पानी बन्द गरिएपनि सुन्दरीजलस्थित पानी प्रशोधन केन्द्रमा वाग्मतीको पानी प्रशोधन गरी राजधानीवासीलाई दिइने मेलम्ची आयोजनाले जनाएको छ।

गतवर्ष असार १ गते मेलम्ची खोलामा सुक्खा पहिरो आउँदा आयोजनाको पूर्वाधारमा क्षति पुगेको थियो। गत वर्ष बाढी आउनुअघि नै सुरुङमा पानी बन्द गरिएकाले सुरुङभित्र भने क्षति पुग्न पाएको थिएन। यसवर्ष असार अगावै दैनिक पानी पर्ने र बाढी आउन थालेपछि आयोजनाले सावधानी अपनाउँदै मुहानमै पानी बन्द गरेको हो।

प्रकाशित मिति: बुधबार, जेठ १८, २०७९ ०६:५१

#मेलम्ची

प्रतिक्रिया दिनुहोस्