काठमाडौं। लामो समयको पर्खाइपछि जयनगर–कुर्था रेलसेवा औपचारिक रूपमा सञ्चालन हुने भएपछि उद्घाटनको तीव्र तयारी गरिएको छ। औपचारिक रूपमा रेल सेवा उद्घाटन हुने मिति तय भएपछि नेपाल रेल–वे कम्पनीका कर्मचारीहरू त्यसको तयारीमा जुटेका हुन्।
खरिद गरेको करिब दुई वर्ष बित्नलाग्दा समेत रेल सञ्चालनमा नहुँदा स्थानीय एवं रेलका कर्मचारी आत्तिएका थिए । तर, अब भने मिति तय भएपछि स्थानीय, व्यापारी कर्मचारी सबै खुशी भएका छन् ।
पटकपटक सञ्चालन हुने भनिए पनि सञ्चालनमा आउन नसके रेल यही चैत ८ गते मङ्गलबार सरकारको सिफारिसमा राष्ट्रपति विद्यादेवी भण्डारीले रेल–वे अध्यादेश, २०७८ जारी गरेपछि रेल–वे कम्पनी रेल सेवा सञ्चालनका लागि जुटेको हो ।
‘रेल सेवा सञ्चालनका लागि सम्पूर्ण तयारी फागुन १ गतेभन्दा पहिले नै भए पनि कानून अभावमा औपचारिक रूपमा सञ्चालन गर्न सकेका थिएनौँ । तर, अध्यादेश जारीपछि भने उद्घाटन मिति तय भएको हो,’ नेपाल रेल–वे कम्पनी लिमिटेडका महाप्रबन्धक निरञ्जन झाले भने ।
रेल्वे सेवाको उद्घाटन नेपालका प्रधानमन्त्री शेरबहादुर देउवा र भारतका प्रधानमन्त्री नरेन्द्र मोदीद्वारा संयुक्त रूपमा भर्चुअल माध्यमबाट हुने उनले जानकारी दिए । आउने चैत्र १९ गते शनिबार नेपाल र भारतका प्रधानमन्त्रीले संयुक्त रूपमा उद्घाटन गर्ने कार्यक्रम तय भएको छ ।
