काभ्रेपलाञ्चोक–सिन्धुली खण्डमा बाढीपहिरोले क्षतिग्रस्त बनाएको विपी राजमार्गको पुनर्निर्माण तीव्र गतिमा भइरहेको छ। सडक विभागका अनुसार पुनर्निर्माण गरिएको नयाँ ट्रयाकबाट असार १५ गतेदेखि सवारीसाधन सञ्चालन गर्ने तयारी गरिएको छ।
गत वर्षको बाढीपहिरोले भकुण्डेबेँसीदेखि नेपालथोकसम्म करिब ३० किलोमिटर सडकमा ठूलो क्षति पुर्याएको थियो। त्यसयता रोशी खोलामा अस्थायी डाइभर्सन बनाएर यातायात सञ्चालन हुँदै आएको थियो।
हाल अधिकांश स्थानमा ग्राभेल हाल्ने काम सम्पन्न भइसकेको छ भने केही ठाउँमा सडकलाई थप मजबुत बनाउन ठूला ढुङ्गा राख्ने काम जारी छ। चारसयबेँसी, बोक्सीकुना, कालढुङ्गा र डालाबेँसी क्षेत्रका सडकखण्ड सञ्चालनयोग्य बनिसकेका छन्।
डिभिजन सडक कार्यालय भक्तपुरका अनुसार वर्षायाममा पनि सडक अवरुद्ध नहोस् भन्ने लक्ष्यका साथ काम भइरहेको छ। दीर्घकालीन रूपमा भने विपी राजमार्गलाई दुई लेनको आधुनिक सडकमा स्तरोन्नति गरिनेछ र आवश्यक पुलहरू पनि विस्तार गरिने योजना छ।
हाल निर्माण कार्य र सम्भावित जोखिमलाई ध्यानमा राख्दै बेलुका ५ बजेदेखि बिहान ५ बजेसम्म रातिको सवारी आवागमनमा रोक लगाइएको छ। पुनर्निर्माण सम्पन्न भएपछि पूर्वी र मध्यपहाडी क्षेत्रलाई काठमाडौंसँग जोड्ने यो महत्त्वपूर्ण राजमार्गमा यात्रा थप सहज र सुरक्षित हुने अपेक्षा गरिएको छ।
