तनहुँ। तनहुँ डिभिजन वन कार्यालयले पार्क निर्माण गर्ने भएको छ। कार्यालयले चालु आर्थिक वर्षमा आठ वटा पार्क निर्माण गर्ने भएको हो।
सङ्घीय सरकारको रु ६० लाख र प्रदेश सरकारको रु २० लाख गरी रु ८० लाखको लागतमा पार्क निर्माण गर्न लागिएको हो।
उक्त कार्यालयले जिल्लाका विभिन्न स्थानमा पर्यावरण व्यवस्थापनका लागि पार्क निर्माण गर्न बजेट विनियोजन गरिएको जनाएको छ। सङ्घीय सरकारमार्फत विनियोजित बजेटबाट चार वटा पार्क निर्माण गरिने बताइएको छ।
भानु नगरपालिका–१३ मिर्लुङमा रु २० लाख र बन्दीपुर गाउँपालिकामा रु २० लाखको लागतमा सहिद स्मृति पार्क निर्माणका लागि बजेट प्राप्त भएको कार्यालयले जनाएको छ। शुक्लागण्डकी नगरपालिका वडा नं. ८ ढोरफिर्दीस्थित सहिद कृष्ण पार्क संरक्षण तथा व्यवस्थापनका लागि रु १० लाख र ऋषिङ गाउँपालिका–७ स्थित सहिद पार्क निर्माणका लागि रु १० लाख प्राप्त भएको हो।
त्यसैगरी प्रदेश सरकारमार्फत चार वटा पार्क निर्माण गर्न रु २० लाख बजेट विनियोजन भएको छ। म्याग्दे गाउँपालिका–१ टाइगरहिलस्थित बेलडाँडा हरित पार्क निर्माणका निम्ति रु पाँच लाख, भिमाद नगरपालिका वडा नं. ७ स्थित श्रीकृष्ण सहिद हरियाली पार्कलाई रु पाँच लाख, व्यास नगरपालिका वडा नं. ८ स्थित सोतीवेशी सहिद हरियाली पार्कलाई रु पाँच लाख र घिरिङ गाउँपालिका–२ डुम्रीवेशीस्थित सागुमुख हरित पार्कलाई रु पाँच लाख बजेट विनियोजन भएको बताइउको छ।
