दार्चुला । दार्चुलाको पारिबगर खण्डेश्वरी जोड्ने सडक अवरुद्ध हुँदा समस्या बढेको छ । गत असारदेखि सडक अवरुद्ध हुँदा बिरामीलाई उपचार गर्न समस्या भएको हो ।
अपिहिमाल गाउँपालिका–५ मकरीगाडसम्म सडक सञ्चालन हुँदा राहत पाएका बिरामी अपिहिमाल–५ तिम्लामा सडक अवरुद्व हुँदा मारमा परेका छन् ।
बिरामीलाई डोको र स्टेचरमा बोकेर अस्पताल लैजानु परेको अपिहिमाल–३ का विरा रोकायाले बताए । बिरामीलाई गोकुलेश्वर, दार्चुला सदरमुकाम खलङ्गा र धनगढी लैजान घण्टौं बोक्नुपर्ने अवस्था छ । ठेकेदारले सडक पुनर्निर्माणमा चासो नदिँदा समस्या भोग्नुपरेको छ ।
खण्डेश्वरीका धीरज बोहरा लामो समयदेखि सडक पुनर्निर्माण नगर्दा बिरामीले समयमै उपचार पाउन नसकेको बताउँछन् । सडक खुलाउन ढिलाइ गर्दा स्थानीय वासिन्दालाई सास्ती भएको छ । उक्त क्षेत्रमा सुविधा सम्पन्न अस्पताल छैनन् ।
