काठमाण्डौं। तनहुँको खैरेनीटार–भिमाद सडकखण्ड दैनिक ९ घण्टा अवरुद्ध हुने भएको छ। सडक डिभिजन कार्यालय तनहुँले उक्त खण्ड मर्मतका लागि दैनिक बिहान ८ बजेदेखि बेलुका ५ बजेसम्म सडक बन्द गर्ने भएको हो।
निमित्त डिभिजन प्रमुख कल्याण खड्काका अनुसार उक्त सडकखण्डको दोभानमा सडक स्तरोन्नति गर्ने क्रममा अहिले रहेको सडकलाई चौडाइ गर्नुपर्ने र त्यसका लागि केही समय सडक बन्द गर्दै निर्माण गर्नुपर्ने भएको हो। निर्माण कार्य गर्दा दुर्घटना घट्न सक्ने सम्भावना देखिएकाले सडक चौडा पार्ने कार्य सम्पन्न नहुञ्जेल सडक अवरुद्ध हुने उनले जानकारी दिए। सडक निर्माणका क्रममा सडक अवरुद्ध भए पनि आवश्यकताअनुसार करिब १ घण्टा बन्द हुने तथा ३० मिनेट सडक खोलिनेछ।
उक्त सडकखण्ड गत साउनदेखि स्तरोन्नति सुरु गरिएको हो। उक्त कामका लागि कार्यालयले काठमाडौँस्थित श्री महालक्ष्मी/हिमाली जेभीबीच सम्झौता गरेको थियो। खैरेनीटार–भिमाद–भुमरीघाट–कावासोती सडकको शुक्लागण्डकी नगरपालिका र म्याग्दे गाउँपालिकाको पाँच किलोमिटर सडक फराकिलो बनाएर नयाँ कालोपत्रे गरिनेछ।
सात करोड ४५ लाख २१ हजारको लागतमा उक्त कामको ठेक्का लागेको छ। गत वैशाख १३ गते एमएस महालक्ष्मी हिमाली जेभी काठमाडौँसँग निर्माण सम्झौता भएको थियो तर वर्षा र कोरोनाको कारण समयमै काम सुरु हुन सकेको थिए। विसं २०७९ कात्तिक १३ गतेसम्म उक्त काम सम्पन्न गर्ने म्याद रहेको छ।
