खिम्ती जलविद्युत् आयोजनाको स्वामित्व हस्तान्तरणका लागि प्राधिकरणद्वारा वार्ता समिति पुनर्गठन

ऊर्जा, सिंचाई तथा जलस्रोत

गृहपृष्ठ
ऊर्जा, सिंचाई तथा जलस्रोत
खिम्ती जलविद्युत् आयोजनाको स्वामित्व हस्तान्तरणका लागि प्राधिकरणद्वारा वार्ता समिति पुनर्गठन

खिम्ती जलविद्युत् आयोजनाको स्वामित्व हस्तान्तरणका लागि प्राधिकरणद्वारा वार्ता समिति पुनर्गठन

शुक्रबार, जेठ २२, २०८३ निर्माणपाटी संवाददाता

काठमाडौं । नेपाल विद्युत् प्राधिकरणले ६० मेगावाट क्षमताको खिम्ती जलविद्युत् आयोजनाको शेयर स्वामित्व हस्तान्तरण तथा आगामी सञ्चालन र व्यवस्थापनका विषयमा छलफल गर्न वार्ता समितिको पुनर्गठन गरेको छ । प्राधिकरण सञ्चालक समिति सदस्य अंशुकिरण शाहीको संयोजकत्वमा गठित यस समितिले आयोजनाको स्वामित्व, नयाँ विद्युत् खरिद सम्झौता (पीपीए), रोयल्टी र कर भुक्तानी लगायतका महत्त्वपूर्ण विषयमा प्रवद्र्धक कम्पनी हिमाल पावर लिमिटेडसँग आवश्यक वार्ता गर्ने जिम्मेवारी पाएको छ ।

निर्माण, सञ्चालन, व्यवस्थापन तथा हस्तान्तरण (बुट) मोडल अन्तर्गत निर्माण भएको यस आयोजनाले २०५७ असार २७ गतेदेखि व्यावसायिक उत्पादन सुरु गरेको थियो । विद्यमान सम्झौता अनुसार उत्पादन सुरु भएको २० वर्षपछि आयोजनाको ५० प्रतिशत स्वामित्व प्राधिकरणमा हस्तान्तरण हुनुपर्ने भए तापनि विभिन्न प्राविधिक कारणले उक्त प्रक्रिया अझै टुंगो लाग्न सकेको छैन ।

यसैगरी, प्राधिकरण सञ्चालक समितिले विद्युत् महसुल, जरिवाना तथा अन्य प्रशासनिक निर्णयहरूसँग सम्बन्धित विवादहरूको पुनरावलोकन र समाधानका लागि अर्को एक समिति पनि गठन गरेको छ । सञ्चालक समिति सदस्य कृष्ण बसेलको संयोजकत्वमा गठित उक्त ’प्रशासकीय पुनरावलोकन समिति’ले प्राधिकरणका प्रशासनिक तथा महसुल सम्बन्धी समस्याहरूको अध्ययन गरी समाधानको पहल गर्नेछ ।

यसका साथै, प्राधिकरणमा हाल रिक्त रहेका विभिन्न पदहरूमा पदपूर्ति प्रक्रियालाई पारदर्शी र व्यवस्थित रूपमा अघि बढाउन सञ्चालक समितिले विशेष निर्णय गरेको छ । जसअन्तर्गत प्राधिकरणकै पूर्व उपकार्यकारी निर्देशक शान्तिलक्ष्मी शाक्यलाई विज्ञ सदस्यका रूपमा नियुक्त गरिएको छ । शाक्यको नियुक्तिले प्राधिकरणको जनशक्ति व्यवस्थापन र पदपूर्ति प्रक्रियामा थप प्रभावकारिता आउने विश्वास गरिएको छ ।

प्रकाशित मिति: शुक्रबार, जेठ २२, २०८३ १८:४३

प्रतिक्रिया दिनुहोस्