लोमान्थाङमा १५० सडक बत्ती जडान

सडक तथा पुल

गृहपृष्ठ
सडक तथा पुल
लोमान्थाङमा १५० सडक बत्ती जडान

लोमान्थाङमा १५० सडक बत्ती जडान

आइतबार, जेठ १५, २०७९ निर्माणपाटी संवाददाता

काठमाडौं। माटोको पर्खालले घेरिएको मुस्ताङको धार्मिक, पर्यटकीय महत्वको ऐतिहासिक र सांस्कृतिक बस्ती लोमान्थाङमा सडक बत्ती जडान भएको छ। लोमान्थाङ गाउँपालिकाको केन्द्रसमेत रहेको लोमान्थाङका चोक र सडक छेउमा सडक बत्ती जोडेर रातको समयमा उज्यालो बनाइएको हो।

अमेरिकन हिमालयन फाउण्डेशनको आर्थिक सहयोगमा लोमान्थाङ गाउँपालिका र जिग्मे फाउण्डेशनको समन्वयमा १५०सडक बत्ती जडान गरिएको उपभोक्ता समितिले जनाएको छ।

लोमान्थाङको पर्खालभित्र र बाहिरको सडक छेउमा बत्ती जडान गरेपछि रातको समयमा उज्यालो हुँदा हिँडडुल गर्न सहज हुनुका साथै गाउँ आकर्षक बनेको बताईएको छ। एक सय ४६ वटा काठका पोल र चार वटा व्यक्तिका घरमा सडक बत्ती जडान गरिएको छ। काठका पोललाई कलात्मक बनाइएको छ। बस्तीभित्र विद्युतको तारलाई भूमिगत बनाइएको छ। सन् २०२० देखि सुरु गरिएको सडक बत्ती जडान गर्ने काम केही दिनअघि मात्रै सकिएको हो।

जिग्मे फाउण्डेशनले सडक बत्ती जडान गर्न रु ४९ लाख खर्च भएको बताएको छ। केन्द्रीय प्रसारण लाइनको विद्युत् सुविधा पुगेपछि जनप्रतिनिधिहरुले सडक बत्ती जडानको योजना अघि सारेका थिए।

सडक बत्तीको मिटर बक्स जडान गरेको लोमान्थाङ गाउँपालिकाले महशुल तिर्ने व्यवस्था मिलाएको छ। माटोको पर्खालभित्र रहेको लोमान्थाङको मुख्य बस्तीमा तत्कालीन मुस्ताङ राजाको दरबार र गुम्बासहित करिब २०० माटोले बनेका घर छन्।

प्रकाशित मिति: आइतबार, जेठ १५, २०७९ १९:०३

#सडक बत्ती

प्रतिक्रिया दिनुहोस्