अझै गति लिएन प्रदेशसभा भवन निर्माणले

भवन तथा शहरी विकास

गृहपृष्ठ
भवन तथा शहरी विकास
अझै गति लिएन प्रदेशसभा भवन निर्माणले

अझै गति लिएन प्रदेशसभा भवन निर्माणले

शुक्रबार, असार २४, २०७९ रासस

काठमाडौं। लुम्बिनी प्रदेशसभा भवन निर्माणमा निकै ढिलाइ भइरहेको छ। प्रदेशको स्थायी राजधानी दाङ देउखुरीमा निर्माण भइरहेको भवनको कामले पछिल्लो समय गति लिन सकेको छैन । भवन निर्माणमा ढिला भएसँगै राजधानी कार्यान्वयनमा पनि ढिलाइ भइरहेको छ।

मुख्यमन्त्री कुलप्रसाद केसीले भवन निर्माणमा ढिलाइ नगर्न पटक–पटक निर्देशन दिने गरेको भए पनि कामले गति लिन सकेको छैन । प्रदेश राजधानी बुटवलबाट देउखुरीमा स्थानान्तरण गर्न समेत अन्योल भइरहेको जनाइएको छ ।

गत साउनमा केसीले मुख्यमन्त्रीको पद सम्हाल्नेबित्तिकै भवन निर्माणलाई पहिलो प्राथमिकता राख्दै प्रदेश राजधानी स्थानान्तरण छिटो गर्ने बताए । भवन निर्माणका लागि लुम्बिनी प्रदेश पूर्वाधार विकास प्राधिकरण र वाइवी इन्फ्रास्ट्रक्चर एण्ड सप्लायर्सबीच २०७८ वैशाख २४ मा रु पाँच करोड २१ लाख बढीमा ठेक्का सम्झौता भएर काम सुरु भएको थियो। पहिलो सम्झौताअनुसार चार महिनामा (२०७८ साउनभित्र) भवन बनाइसक्नुपर्ने हो । तर काममा ढिलाइ हुँदा प्रदेश सरकारले निर्माण कम्पनी नै परिवर्तन गरेर भवन निर्माणलाई छिटो सक्ने गरी काम अघि बढायो ।

प्रदेशसभा भवन निर्माण गरी सक्न एक महिना लाग्ने प्रदेश पूर्वाधार विकास प्राधिकरणका कार्यकारी अधिकृत छविराज पोखरेलले जानकारी दिए । हालसम्म करिब ९० प्रतिशत काम सम्पन्न भएको उनले बताए। उनका अनुसार निर्माण सामानको अभाव हुँदा भवन निर्माणमा ढिलाइ एवं कामले तीव्र गति लिन सकेको हो ।

सिभिल स्टक निर्माणको जिम्मा पाएको कम्पनीका प्रतिनिधि विनोद राईले निर्माण सामग्री भएमा काम गर्न धेरै समय नलाग्ने बताए। तर अहिले सामान अभाव भइरहेकाले काम छिटो हुनसकेको छैन । उनका अनुसार सामान अभावमा केही दिनअघि कामसमेत रोकिएको थियो। उनले आफूहरूले गरेको कामको भुक्तानी नहुँदा सामानको अभाव हुन गएको बताए।

प्रकाशित मिति: शुक्रबार, असार २४, २०७९ १९:३४

प्रतिक्रिया दिनुहोस्