काठमाडौं। भारत सरकारको आर्थिक सहयोगमा निर्माण हुन लागेको बुटवलस्थित श्री नहरपुर माध्यमिक विद्यालयको नयाँ भवनको शिलान्यास गरिएको छ। रुपन्देहीस्थित श्री नहरपुर माध्यमिक विद्यालयको नयाँ भवन निर्माणका लागि काठमाडौंस्थित भारतीय राजदूतावासका विकास साझेदारी तथा पुनर्निर्माण प्रभागका प्रमुख करुण वंशल र बुटवल नगरपालिकाका मेयर शिवराज सुवेदीले आज शिलान्यास गरेका हुन्।
भारत–नेपाल विकास साझेदारी कार्यक्रम अन्तर्गत उच्च प्रभाव सामुदायिक विकास परियोजनाको रुपमा सो नयाँ विद्यालय भवनको निर्माण करिब ४ करोड ४ लाख १७ हजार लागतमा हुने भएको छ।सन् १९७१ मा स्थापना भएको श्री नहरपुर माध्यमिक विद्यालय त्यस क्षेत्रको सबैभन्दा पुरानो विद्यालय हो। निर्माण सम्पन्न भएपछि सो विद्यालय नयाँ भवनमा सर्नेछ। अहिले विद्यालयमा ११२७ जना विद्यार्थीहरु अध्ययनरत रहेकोमा करिब ५० प्रतिशत छात्रा रहेका छन्। सन् २००३ यता भारतले नेपालका सातैवटा प्रदेशमा स्वास्थ्य, खानेपानी, कनेक्टिभिटी, सरसफाइलगायत सार्वजनिक उपयोगिताका क्षेत्रहरुमा उच्च प्रभाव सामुदायिक विकास परियोजनाअन्तर्गत ४५४ वटा परियोजनाको निर्माण सम्पन्न गरिसकेको छ।
त्यस्तै यी परियोजनाहरुमध्ये रुपन्देही जिल्लामा निर्माण सम्पन्न भएका १० गरी प्रदेश ५ मा ६० वटा परियोजना रहेकोमा सोही जिल्लाका दुई गरी ९ वटा परियोजना निर्माणका विभिन्न चरणमा रहेका छन्। भारत र नेपालबीच बहुआयामिक तथा बहुक्षेत्रीय विकास साझेदारी रहेको छ जसले दुई देशका जनताबीचको निकटतालाई प्रतिबिम्बित गर्दछ। साथै हिजोको शिलान्यासले प्राथमिकताका क्षेत्रहरुमा पूर्वाधार विकास गर्न नेपाल सरकारले गरेका प्रयासमा हातेमालो गर्न भारत सरकार सधैँ प्रतिबद्ध रहेको तथ्यलाई प्रतिबिम्बित गर्ने जनाइएको छ।
