काठमाडौं। अष्ट्रेलिया सरकारले जाजरकोछ भूकम्पमा पीडितहरुका लागि सहयोग गर्ने भएको छ। आकस्मिक आवश्यकता परिपूर्तिका लागि ६ लाख अष्ट्रेलियाली डलर अर्थात् करिब पाँच करोड ९ लाख रूपैयाँ बराबरको मानवीय सहायता घोषणा गरेको हो।
उक्त सहयोग नेपालस्थित विश्व खाद्य कार्यक्रमले नगदका लागि काम कार्यक्रममार्फत प्रभावित समुदायलाई प्रदान गर्ने नेपालस्थित अष्ट्रेलियाली राजदूतावासले जनाएको छ। नेपालस्थित संयुक्त राष्ट्रसङ्घीय जनसङ्ख्या कोषले मानसिक स्वास्थ्य सेवा, प्रजनन स्वास्थ्य सेवा र लैङ्गिक हिंसापीडितका लागि प्राप्त सहायता परिचालन गर्नेछ।
उक्त सहयोगमार्फत मानव विकास तथा सामुदायिक सेवा (एचडिसीएस) संस्थाले भूकम्प प्रभावित स्वास्थ्य संस्थालगायत सार्वजनिक संरचनाको पुनर्निमाणमा सहयोग गर्नेछ।
नेपालका लागि अष्ट्रेलियाका राजदूत फेलिसिटी भोल्केले पश्चिम नेपालमा भएको भूकम्प र त्यसपछि पराकम्पले निम्त्याएको मानवीय र सम्पत्तिको क्षतिप्रति गहिरो दुःख समेत व्यक्त गरे।
