कास्की । पोखरामा आजदेखि घर निर्माण फेष्ट (महोत्सव) सुरु भएको छ । घर निर्माणसँग सम्बन्धित काम गर्ने कम्पनी स्किल सेवाको आयोजनामा महोत्सव सुरु गरिएको हो ।
घर निर्माणमा आवश्यक सम्पूर्ण सूचना प्रवाह र सहजीकरणका लागि पोखराको अमरसिंह खेल मैदानमा दुई दिनको महोत्सव गर्न लागिएको बिहीबार आयोजित पत्रकार सम्मेलनमा जानकारी दिइयो ।
महोत्सवमा घर निर्माणमा आवश्यक सामग्री, प्रविधि, नीति नियमको जानकारी, घर निर्माणमा खर्च कम गर्ने उपायलगायत निर्माणका लागि आवश्यक सम्पूर्ण जानकारी प्रदान गरिने स्किल सेवाका मार्केटिङ विभाग प्रमुख सफल प्रधानले बताए । यसका लागि महोत्सवमा निर्माण व्यवसायी, इन्जिनियर, वास्तुकलाविद्, आर्किटेक्टको सहभागिता रहनेछ । महोत्सवमा निर्माणसँग सम्बन्धित कम्पनी र विभिन्न बैंकको गरेर ३५ वटा स्टल रहने उनले बताए ।
आफूहरुको कम्पनीले पोखरामा निरीक्षण गरेका ६ हजारमध्ये ८० प्रतिशत घरमा कुनै न कुनै प्रकारको समस्या भेटेको प्रधानले सुनाए । उनकाअनुसार डिजाइन, वास्तु, सिपेजजस्ता समस्या धेरै घरमा देखिएका छन् । घर निर्माणमा दक्षताको कमी देखिएको उनले सुनाए ।
महोत्सवमा इन्जिनियर, आर्किटेक्टसहित प्राविधिक जनशक्तिले जागिरका लागि निवेदन दिन सक्ने उनले बताए ।
