काठमाडौँ । तीन दिनमै नेपाल प्रहरीका नवनिर्मित तीन वटा भवन हस्तान्तरण गरिएको छ । सर्लाही, बाँके र कपिलवस्तुकाका भवन निर्माण गरी हस्तान्तरण गरिएको प्रहरी प्रधान कार्यालयले जानकारी दिएको छ ।
नेपाल प्रहरीका केन्द्रीय प्रवक्ता, प्रहरी नायब उपरीक्षक अविनारायण काफ्लेले ती भवनहरू ‘फरेन कमन वेल्थ एण्ड डेभलभमेन्ट अफिस’ बेलायतको आर्थिक सहयोगमा सेक्युरिटी र जष्टिस कार्यक्रमअन्तर्गत निर्माण सम्पन्न भएको हो ।
उक्त परियोजनाअन्तर्गत हालसम्म चार वटा भवन निर्माण भइसकेको र ११ वटा भवनहरू निर्माणको क्रममा रहेका उनले बताए । विगत लामो समयदेखि बेलायत सरकारले नेपाल प्रहरीको क्षमता विकास, पूर्वाधार विकास, प्रशिक्षण र समुदायसँगको समन्वय र सहकार्य बढाउनको लागि विभिन्न परियोजनामार्फत महत्त्वपूर्ण सहयोग गर्दै आइरहेको प्रहरी प्रधान कार्यालयले जनाएको छ ।
हस्तान्तरण गरिएका भवनमा इलाका प्रहरी कार्यालय बरहथवा सर्लाहीको परिसरमा नवनिर्मित महिला बालबालिका तथा ज्येष्ठ नागरिक सेवा केन्द्रको कार्यालय, इलाका प्रहरी कार्यालय कोहलपुर बाँके र वडा प्रहरी कार्यालय चन्द्रौटा कपिलवस्तुको परिसरमा नवनिर्मित महिला बालबालिका तथा ज्येष्ठ नागरिक सेवा केन्द्रको कार्यालय रहेका छन् ।
