विपन्न र घरबारविहीन परिवारलाई नमूना घर हस्तान्तरण

भवन तथा शहरी विकास

गृहपृष्ठ
भवन तथा शहरी विकास
विपन्न र घरबारविहीन परिवारलाई नमूना घर हस्तान्तरण

विपन्न र घरबारविहीन परिवारलाई नमूना घर हस्तान्तरण

शुक्रबार, चैत १८, २०७८ निर्माणपाटी संवाददाता

काठमाडौं। रूपन्देहीको सैनामैना नगरपालिकामा विपन्न तथा घरबारविहीन परिवारलाई नमूना घर हस्तान्तरण गरिएको छ। वर्षौंदेखि सैनामैनामा बसोबास गर्दै आएका तर घरबारविहीन रहेका अत्यन्त विपन्न परिवारलाई छनोट गरी बिहीबार नगरपालिकाले नमूना बस्ती हस्तान्तरण गरेको हो।

सैनामैना नगरपालिकाले चक्रपथ निर्माण गर्दा विस्थापित हुनसक्ने परिवारका लागि भन्दै वडा नं ११ कञ्चन खोलाको किनारमा नमूना बस्ती निर्माण गरेको थियो।

तराई–मधेस समृद्धि कार्यक्रमको ७० प्रतिशत र नगरपालिकाको ३० प्रतिशत लागत साझेदारीमा निर्माण गरिएका नमूना घरमा एक शौचालय र तीन कोठा रहेका छन्। आर्थिक वर्ष २०७५/७६ देखि सुरू गरिएको बस्ती निर्माणमा रु एक करोड ८६ लाख ५७ हजार बजेट लगानी भएको नगरपालिकाले जनाएको छ। नगरपालिकाले निर्माण गरेका १० घरमध्ये बिहीबार नौ घर हस्तान्तरण गरिएको हो।

नगरपालिकाका सबै वडाबाट एक/एक सबभन्दा विपन्न परिवार छनोट गरी घर हस्तान्तरण गरिएको छ। नगरपालिकाले उपप्रमुख बीना रानाको संयोजकत्वमा सन्तकुमार चौधरी र पञ्जीकरण अधिकृत केशवराज अर्याल सदस्य रहेको समिति गठन गरी विपन्न परिवार छनोट गरेको थियो। वडा कार्यालय र समितिले गरेको सिफारिसका आधारमा उक्त परिवारलाई घर हस्तान्तरण गरिएको हो।

प्रकाशित मिति: शुक्रबार, चैत १८, २०७८ १०:३१