कालापानी क्षेत्रमा चुच्चे नक्सासहितको राष्ट्रिय स्तम्भ निर्माण, राष्ट्रपतिले उद्घाटन गर्ने

राष्ट्रिय

गृहपृष्ठ
राष्ट्रिय
कालापानी क्षेत्रमा चुच्चे नक्सासहितको राष्ट्रिय स्तम्भ निर्माण, राष्ट्रपतिले उद्घाटन गर्ने

कालापानी क्षेत्रमा चुच्चे नक्सासहितको राष्ट्रिय स्तम्भ निर्माण, राष्ट्रपतिले उद्घाटन गर्ने

सोमबार, असोज १७, २०७९ निर्माणपाटी संवाददाता

काठमाडौं। भारतले अतिक्रमण गरेको नेपाली भूमि समेटेर कालापानी क्षेत्रमा राष्ट्रिय स्तम्भ निर्माण गरिएको छ । ब्यास गाउँपालिकाले चुच्चे राष्ट्रिय स्तम्भको निर्माण गरेको हो । सो स्तम्भको उद्घाटन राष्ट्र प्रमुख विद्यादेवी भण्डारीबाट गराइने भएको छ ।

नेपालको कालापानी क्षेत्र सधैँ भारतको सीमा अतिक्रमण गरेको विषयले चर्चामा आउने गरेको छ । तत्कालीन समयमा केपी शर्मा ओली नेतृत्वको सरकारले कालापानी, लिपुलेक र लिम्पियाधुरा समेटिएको चुच्चे नक्सा जारी गरेपछि यसको चर्चा थप चुलिएको थियो ।

ओली नेतृत्वको सरकारले नक्सा जारी गरे पनि भारतले त्यस क्षेत्रमा जाने सडक निर्माणको काम भने जारी नै राखेको छ । स्थानीय सरकारको नेतृत्व गरेका ब्यास गाउँपालिकाका अध्यक्ष मङ्गलसिंह धामीको टिमले कालापानी क्षेत्रमा चुच्चे नक्सा समेटिएको राष्ट्रिय स्तम्भ ठड्याएको छ । कालापानी क्षेत्रमा बनेको सो स्तम्भ उद्घाटनका लागि राष्ट्रपति विद्यादेवी भण्डारी त्यसतर्फ जाने निश्चित भएको छ ।

ब्याँस गाउँपालिकाको वडा नम्बर १ छाङरुमा निर्माण भएको स्तम्भ उद्घाटनका लागि असोज २७ गते राष्ट्रपति भण्डारी दार्चुला जाने राष्ट्रपति कार्यालयले पुष्टि गरेको छ । व्यास गाउँ कार्यपालिका बैठकले गत साउन ९ गते राष्ट्रपति भण्डारीलाई व्यास भ्रमणको निम्तो दिने निर्णय गरेको थियो ।

अध्यक्ष धामीले कालापानी क्षेत्रमा राज्यको उपस्थिति गराउनका लागि राष्ट्रपतिको भ्रमण महत्त्वपूर्ण रहेको बताए । पालिकाले करिब १५ लाख बजेटमा यो स्तम्भ निर्माण गरेको हो । चुच्चे नक्सासहितको राष्ट्रिय स्तम्भ उद्घाटनका लागि कालापानी क्षेत्रमा राष्ट्रपतिको उपस्थिति हुनुलाई महत्त्वका साथ हेरिएको छ ।

प्रकाशित मिति: सोमबार, असोज १७, २०७९ १२:०२

प्रतिक्रिया दिनुहोस्