सिरहा । इन्जिनियर प्रमोदकुमार यादवको गोली हानी हत्या भएको चार दिन बितिसक्दा पनि दोषी पक्राउ नपरेको विरोधमा बिहीबार सिरहामा तनाव सिर्जना भएको छ ।
हत्यारालाई कानुनी दायरामा ल्याउन र पीडित परिवारलाई न्याय दिन माग गर्दै स्थानीयले महेन्द्र राजमार्ग अन्तर्गत धनगढीमाई बजारमा चक्काजाम गरेका छन् ।
प्रदर्शनकारीहरूले सडकमा टायर बालेर यातायात अवरुद्ध पारेपछि पूर्व–पश्चिम राजमार्ग केही समयका लागि ठप्प बनेको थियो । उनीहरूले राज्यले नागरिकको जीउधनको सुरक्षा गर्न नसकेको र अपराधीको सुराकसम्म पत्ता लगाउन नसकेको भन्दै गृहमन्त्री ओमप्रकाश अर्यालको राजीनामा समेत मागेका छन् ।
‘घटना भएको चार दिन बितिसक्दा पनि प्रहरी प्रशासन मौन रहनु दुःखद छ,’ प्रदर्शनमा उत्रिएका एक स्थानीयले भने, ‘दोषीलाई तत्काल पक्राउ नगरिए कडा आन्दोलन गर्नेछौँ ।’
