रसुवामा निर्माणाधीन २१६ मेगावाट क्षमताको माथिल्लो त्रिशूली–१ जलविद्युत् आयोजनामा भदौ १० गते आएको विनाशकारी बाढीबाट हालसम्म ३९ जनाको मृत्यु भएको पुष्टि भएको छ। आयोजनाका अनुसार ४३९ जना अझै सम्पर्कविहीन छन्।
बाढीका बेला आयोजनास्थलमा नेपाली, कोरियाली, चिनियाँ र भारतीयसहित १ हजार ४३३ जना जनशक्ति कार्यरत थिए। तीमध्ये ८७७ जनाको उद्धार गरिएको छ भने ७८ जना सम्पर्कमा आएका छन्।
सुरुङ, भूमिगत विद्युत्गृह र अन्य संरचनामा मानिस पुरिएको हुनसक्ने आशंकामा खोजी तीव्र पारिएको छ। नेपाली सेना, सशस्त्र प्रहरी, नेपाल प्रहरी, कोरियाली विज्ञ तथा आयोजनाको टोली उद्धारमा खटिएका छन्। सडक बाढीले बगाएपछि हेलिकप्टरबाट उपकरण पुर्याएर भग्नावशेष हटाउने काम भइरहेको कम्पनीले जनाएको छ।
